María Miramontes.

No día de onte a Factoría Ronsel fixo eco da figura de María Miramontes.
A Casa-Museo súmase á reivindicación da figura de María, muller galega nada no ano 1895 en Bergondo.
A información que recolle Ronsel a redor da figura de María no seu perfil no día de onte é a seguinte:
“De todos os esquecementos da historia galega, un dos máis vergoñentos é o de María Miramontes. Se Castelao dixo do seu home, Ánxel Casal, aquelas fermosas palabras de "Fixo máis por Galiza que todos nós", sen dúbida ela fixo tanto como Casal. Nacida en Bergondo en 1895, militou nas Irmandades da Fala. Desde o seu taller de costura saíron os cartos para a editorial Nós, para A Nosa Terra, para as Escolas de Insiño en Galego e para infinidade de proxectos colaborando tamén, de forma importante, no sostén económico das Irmandades e do Partido Galeguista. Incluso cando Ramón Suárez Picallo volta de Madrid despois de perder a súa acta de deputado (con 50 pesetas no peto e como di Luis Seoane con todo o que tiña nun fardel de mariñeiro) é o taller de costura quen sufraga os gastos dos seus estudos. Por suposto cose tamén os libros da editorial Nós e de Lar e colabora activamente na campaña do estatuto. Cando o seu home é asasinado na guerra civil, María marcha a Bos Aires onde atopa a amizade da familia Dieste e de Luis Seoane. Este, cando morre María en 1964, escribe un artigo para Galiza Emigrante laiándose do esquecemento no que caeu a súa figura e di: "... estraía os seus aforros do seu traballo de modista para invertilos nos deficts de A Nosa Terra, da revista Nós, dos temas dos Arquivos do Seminario de Estudos...". Sen dúbida, ela fixo por Galiza máis do que ninguén”
Pouco a pouco coñecemos un pouco máis sobre figuras esquecidas, figuras non coñecidas ou figuras pouco reivindicadas.
Parabéns á Factoría Ronsel por achegarnos á figura de María Miramontes.